चितवन, फागुन १२
पूर्वपश्चिम राजमार्गअन्तर्गत भरतपुर महानगरपालिकाभित्र पर्ने पुलचोक-गोन्द्राङ सडक विस्तारको काम सम्पन्न गर्न दश महिना मिति थप गरिएको छ ।
तोकिएको समयमा ६५ प्रतिशत काम सम्पन्न भएपछि बाँकी कामका लागि मिति थप गरिएको हो । डिभिजन सडक कार्यालय भरतपुरका प्रमुख रमेशप्रसाद पौडेलका अनुसार गत माघ २५ गते मिति सक्किएपछि १० महिना थप गरिएको छ। आगामी मंसिर २३ गतेसम्म निर्माण सम्पन्न गर्ने गरी समय थप गरिएको हो ।
सम्झौता भएको २८ महिनाभित्र सम्पन्न गर्नुपर्ने सडक विस्तारको काम कोरोना महामारी, क्रसर बन्द, खानेपानी पाइप, विद्युत् पोल सार्नुपर्नेलगायतका कारण समयमा काम सम्पन्न हुन नसकेको उनले बताए। सो सडकको चौबीसकोठीदेखि पुल्चोकसम्मको काम तीव्र गतिमा भइरहेको छ । बजार क्षेत्रमा काम भइरहेकाले ट्राफिक व्यवस्थापन जटिल बनेको छ ।
काम गरेका क्षेत्रमा सवारीसाधन आवतजावतमा समस्या परेको छ । गोन्द्राङदेखि चौबीसकोठीसम्म दुई तहको कालोपत्रे (डिबिएम) भइसकेको छ । रिजालचोकदेखि चौबीसकोठी खण्डको बीचमा पनि कालोपत्रे गर्ने तयारी गरिएको छ । सडकमा तीन तहको कालोपत्रे हुनेछ । यो सडकमा तीन तहसम्मको कालोपत्रे हुनेछ ।
पचास मिटर चौडा सडक छ दशमलव पाँच किलोमिटर लामो रहेको छ । रु एक अर्ब २३ करोड लागतमा सडक विस्तार गर्न इन्डो सगुन जेभी बुटवलले जिम्मा पाएको छ । ठेकेदारसँग विसं २०७७ कात्तिक ११ गते सम्झौता भएको थियो । यो सडकलाई सहरी क्षेत्र सुन्दर देखिने गरी निर्माण गरिने छ ।
सडकका बीचमा आकर्षक हरियाली हुनेछ । छेउमा फुटपाथ रहने छ । सडकको ठाउँअनुसार फरक-फरक नक्साङ्कन गरेर आकर्षक बनाइएको छ ।
प्रतिक्रिया