नारायणी लिफ्टमा नयाँ पम्प जडान,नहरमा छाडियो पानी

    भरतपुर,४ साउन :   
चितवनको भरतपुर महानगरपालिका–१ स्थित नारायणी लिफ्ट सिँचाइ प्रणालीको पम्पहाउस ‘ए’ मा नयाँ पम्पहरू जडान भएसंगै बिहिबारदेखि नहरमा पानी छाडिएको छ । साउन लागिसक्दा पनि धान रोप्न नपाएर किसानहरू पानी छाडेपछि हर्षित भएका छन् ।

बिहिबार बागमती प्रदेशका स्वास्थ्य मन्त्री उत्तम जोशीले नयाँ पम्पको उद्घाटन र पानी छाड्ने कार्यक्रमको शुभारम्भ गर्नुभयो । सो अवसरमा बोल्दै मन्त्री जोशीले किसानलाई समयमै पानी उपलब्ध गराउन ढिलाइ भएको बताउनुभयो । उहाँले सरकारी काममा ढिलासुस्ती हुने गरेको भन्दै अव कुनैपनि बाहानामा ढिलासुस्तीलाई छुट नहुने बताउनुभयो ।
कार्यक्रममा बागमती प्रदेशका सांसद जेएन थपलियाले सांसद नारायणी लिफ्ट सिँचाइ प्रणाली पुरानो र खर्चिलो भएको भन्दै यसको विकल्प खोज्नुपर्ने बताउनुभयो । उहाँले सवै तहका सरकारको समन्वयमा नारायणी लिफ्ट सिँचाइ नयाँ पम्पहरु जडान गरिएको जानकारी दिनुभयो ।

भरतपुर महानगरपालिका प्रमुख रेनु दाहालले निर्माण कम्पनीको ढिलासुस्तीका कारण पम्प फेर्न चार बर्ष लागेको बताउनुभयो । उहाँले नारायणी लिफ्टलाई बाह्रै महिना सञ्चालनका लागि तयारी गरिएको जानकारी दिनुभयो । “नारायणी नदी र राप्ती नदीमा यति धेरै पानी बगेर खेर गएको छ,प्रमुख दाहालले भन्नुभयो,यसको उपयोग गर्न हिउँदमा पनि सञ्चालन गर्ने तयारी गरेका छौं ।”

उहाँले महानगरपालिकाले पश्चिम चितवनको ७ हजार विघामा सिचाइँ उपलब्ध गराएको भन्दै भूमिगत जलस्रोत सिचाइँ कार्यालय मार्फत सयौं स्यालो र डिप बोरिङ जडान गरिएको जानकारी दिनुभयो । महानगरपालिकाले संघ र प्रदेश सरकारसंग समन्वय गरेर सिचाइँका काम गरिरहेको बताउनुभयो ।

नारायणी लिफ्टमा २६ करोड ३२ लाख ४३ हजार १५१ रुपैंयाको लागतमा यहाँ दुईवटा नयाँ पम्प जडान गरिएको हो । पम्पहाउस ‘ए’ मा रहेका ४० वर्ष पुराना पम्पहरू फेरिएको छ । यो सिचाइँ मार्फत भरतपुरको फूलबारी, केसरबाग, तोरीखेत, शिवनगर, लङ्कु, लक्ष्मीपुर, कल्याणपुर, शरदपुर, गौरीगञ्ज, बसेनीलगायतका क्षेत्रमा सिँचाइका लागि लिफ्टबाट पानी वितरण गर्ने गरिन्छ ।

भारतीय निर्माण कम्पनी डब्लुपीआइएल लिमिटेड कोलकत्ताले पम्प निर्माणको काम गरेको हो । नारायणी लिफ्ट सिँचाइ प्रणालीका अध्यक्ष पूर्णबहादुर रानाभाटले ढिलै भएपनि पानी छाडेपछि किसानले राहत महशुस गरेको बताउनुभयो । विगतमा करिब ५ हजार हेक्टर जमिनलाई सिँचाइ गर्दै आएको नारायणी लिफ्ट सिँचाइ प्रणालीले अहिले करिब ५० प्रतिशत क्षेत्रमात्रै सिँचाइ गर्ने गरेको छ ।