वनडेमा एकै खेलमा बन्यो ७५४ रन, विश्वकपमा सबैभन्दा बढी रनको कीर्तिमान

हैदरावाद– विश्वकप क्रिकेट २०२३ अन्तर्गत शनिवारको रोमाञ्चक खेलमा दक्षिण अफ्रीकाले श्रीलंकालाई १०२ रनको विशाल अन्तरले पराजित गरेको छ ।

पहिला ब्याटिङ गर्दै दक्षिण अफ्रीकाले कीर्तिमानी ४२८ रन बनाएको थियो, जसको जवाफमा श्रीलंकाले ३२६ रन बनायो । यसरी एकै दिन वनडे क्रिकेटमा कीर्तिमानी ७५४ रन बनेको छ ।

विभिन्न कीर्तिमान बनेको हिजोको खेलमा दक्षिण अफ्रीकाका एडेन मार्करामले केवल ४९ बलमा विश्वकप क्रिकेटको इतिहासको सबैभन्दा तिब गतिको शतक बनाए ।

दक्षिण अफ्रीकाकै क्विन्टन डिकक तथा रासी वान डेर डुसेनले पनि शतकीय इनिङ खेलेर श्रीलंकाविरुद्ध कीर्तिमानी लक्ष्य खडा गर्न सफल भए ।

शनिवारको खेलमा डिकक (८४ बलमा १००), डुसेन (११० बलमा १०८) तथा मार्कराम (५४ बलमा १०६) ले शतक प्रहार गरे । विश्वकप क्रिकेटमा ती तीनै जना खेलाडीको पहिलो शतक हो ।

यसबाट दक्षिण अफ्रीका पाँच विकेटको क्षतिमा ४२८ रन बनाएर विश्वकपमा सर्वाधिक रनको अस्ट्रेलियाको कीर्तिमानलाई भंग गर्न सफल रह्यो, जसले २०१५ मा पर्थमा अफगानिस्तानविरुद्ध छ विकेटमा ४१७ रन बनाएको थियो ।

यसको जवाफमा श्रीलंकाको टीमले ४४.५ ओभरमा ३२६ रन बनाएर अलआउट भयो । श्रीलंकाको तर्फबाट कुसल मेन्डिस (४२ बलमा ७६ रन), चरित्र असलंका (६५ बलमा ७९ रन) तथा कप्तान दानुस शनाका (६२ बलमा ६८ रन) ले अर्धशतक प्रहार गरे ।

दक्षिण अफ्रीकाको तर्फबाट जेराल्ड कोएट्जीले तीन विकेट लिए भने केसिगो रबाडा, मार्को यानसेन तथा केशव महाराजले समान दुई विकेट लिए ।