काठमाडौं । इजरायल–गाजा युद्धको एकसय दिन पूरा भएको छ । युद्धबारे बोल्दै इजरायलका प्रधानमन्त्री बेन्जामिन नेतान्याहुले हमासलाई पतन गर्नबाट कसैले रोक्न नसक्ने टिप्पणी गरेका छन् ।
उनले इजरायलले नरसंहार गरिरहेको भन्ने संयुक्त राष्ट्र संघको सर्वोच्च अदालतको भनाइलाई समेत नहेर्ने संकेत गरेका छन् ।
शनिबार एक प्रेस ब्रिफिङका क्रममा उनले भनेका छन्, “हामीलाई कसैले रोक्न सक्दैन । हेगले पनि सक्दैन ।”
दक्षिण अफ्रिकाले अघि सारेको नरसंहारको विषय यहुदीहरूविरुद्ध अर्को नरसंहार गर्न आएकाहरूको निर्देशनमा भएको उनको टिप्पणी छ ।
नेतान्याहुले हमाससँगको युद्ध समाप्त हुनुअघि इजिप्ट र गाजाबीचको सिमाना बन्द गर्नुपर्ने बताएका छन् ।
यसको प्रतिक्रियामा इजिप्टले आफ्नो सिमाना पूर्णरूपमा आफ्नै नियन्त्रणमा रहेको बताएको छ ।
अक्टोबर ७ मा युद्ध सुरु भएयता गाजामा करिब २४ हजार मानिस मारिएका छन् ।
राष्ट्रसंघले गाजामा भोकमरी बढेको र चिसोका कारण स्थिति झनै जटिल हुँदै गइरहेको बताएको छ ।
प्रतिक्रिया